Alemus haldâttâhriehti lii čuávdám uási sämitige vaaljâluvâttâlmân čuoccâm vaidâlusâin

Tain ihekirjemiärádâssáin alemus haldâttâhriehti komettij sämitige haldâttâs miärádâs já meridij, et vaidâleijee kalga merkkejuđ sämitige vaaljâi vaaljâluvâttâlmân jienâstemvuoigâdvuođâlâžžân.

Sämitige haldâttâs 27.8.2019 toohâm miärádâsâin láá šoddâm alemus haldâttâhriähtán taan räi ohtsis suullân 200 vaidâlussâd. Vaidâlusah láá vuolgâttum sämitige haldâttâsân ciälkkámus adelem várás. Vaidâlusâi kieđâvuššâm vättee ääigi já ciälkkámušmonâttâlmij kiergâttem keežild uási miärádâsâin adeluvvojeh eskin roovvâdmáánu peln.

Sämitige vaaljah tuállojeh 2.9.–30.9.2019.

Sämitige vaaljâi tooimâtmist já toos kyeskee nubástusucâmist siäđuduvvoo sämitiggeest adelum laavâst.

Ihekirje 4279/3/19

Sämitiggevaaljah – Merkkim vaaljâluvâttâlmân – Vaanhim sämmilâšvuotâ – Vaanhim merkkejum oovdeb vaaljâi vaaljâluvâttâlmân – OA olmoošvuoigâdvuotâkomitea adelem uáinu – Juávkkutuhhiittem já sämmilij jiešmeridemvuoigâdvuotâ

Sämitige vaaljâlävdikodde lâi hilgom vaidâleijee pivduu šoddâđ merkkejum jienâstemvuoigâdvuođâlâžžân sämitige vaaljâluvâttâlmân. Sämitige vaaljâlävdikodde já sämitige haldâttâs lijjii hilgom vaidâleijee vuoigimvátámâšâid. Vuoigimvátámâšah lijjii hilgum čuujootmáin OA olmoošvuoigâdvuotâkomitea 1.2.2019 adelem uáinoid moh lijjii vuáđudum komitean vuolgâttum almottâssáid, sehe vuáđustâlmáin et sämitige jiešmeridemvuoigâdvuođâst já juávkkutuhhitmist lii tehálâš merhâšume sämitige vaajâluvâttâllâm čokkiimist.

Alemus haldâttâhriehti páhudij, et sämitiggeest adelum laavâst ij lah siäđudum, et sämitige haldâttâs uáivil juávkkutuhhiittem olgosaddelmist ličij ohtuunis tuárvi ko sämmilâšmiärustâllâm tievvâm árvuštâlloo, ige tággáár lah vattum meidgin algâaalmugáid kyeskee aalmugijkoskâsijn sopâmušâin já eres äššikiirjijn. Alemus haldâttâhriehti arvâlij, et vaaljâluvâttâlmân merkkiimân tâi merkkiihánnáá kyeđimân kyeskee miärádâs kalga vuáđuduđ objektivlijd kriteráid, moh čielgih sämitiggeest adelum laavâ 3 §:st. Nuuvtpa tuše juávkkutuhhitmáin vuáđustâlmáin ij pyevti vuáđustâllâđ vaaljâluvâttâlmân merkkiihánnáá kyeđđim tagarijn tábáhtusâin, main vaaljâluvâttâlmân occee persovn tiävdá sämitiggeest adelum laavâ 3 § jiešidentifikaatioiävtu já monnii siämmáá ceehi 1-3 soojijn asâttum objektivlii kriiteer.

Sämitiggeest adelum laavâ 3 § 3 saje mield sämmilâžžân kalga anneeđ persovn, kiän vaanhim lii merkkejum jienâstemvuoigâdvuođâlâžžân sämitige vaaljâin. Tot, et persovn vaaljâluvâttâlmân merkkim laavâmiäldásâšvuotâ lii čovdum alemuu haldâttâhrievti miärádâssáin, vuáđuduvá sämitiggeest adelum laavâst siäđudum nubástusuuccâmmonâttâlmân. Tondiet mainâšum ceehi 3 saje iähtu tiävá meid tagarijn tábáhtusâin, main alemus haldâttâhriehti lii meridâm et persovn vaanhim merkkejuvvoo vaaljâluvâttâlmân ige lah maŋeláá raččom miärádâs.

Vaidâleijee, kote lii almottâm et ana jieijâs sämmilâžžân já kiän vaanhim lii merkkejum jienâstemvuoigâdvuođâlâžžân sämitige vaaljâin, lâi sämitiggeest adelum laavâ 3 §:st uáivildum sämmilâš. Alemus haldâttâhriehti komettij sämitige haldâttâs miärádâs já meridij, et vaidâleijee kalga merkkejuđ sämitige vaaljâi vaaljâluvâttâlmân jienâstemvuoigâdvuođâlâžžân.

Ääšist lâi koččâmuš meid miärádâs vuáđustâllâmkenigâsvuođâst.

Haldâttâhlaahâ 45 § 1 moomeent

Laahâ sämitiggeest 3 §, 21 §, 23 § 1 moomeent, 23 a § 1 moomeent

Aalmugjeessânvuoigâdvuođáid já politlijd vuoigâdvuođáid kyeskee almossopâmuš (KP-sopâmuš) 1 artikla, 25 artikla já 27 artikla

kei meid KHO 2015:146